নতুন দিল্লী
দিল্লী আৰক্ষীয়ে শনিবাৰে পুৱা নীট প্ৰশ্নকাকত ফাদিল আৰু ধৰ্মেন্দ্ৰ প্ৰধানৰ পদত্যাগৰ দাবীত যন্তৰ-মন্তৰত প্ৰতিবাদ সাব্যস্ত কৰি থকা সমাজকৰ্মী সোনম ৱাংচুকক আঁতৰাই পঠিয়াইছে। দিল্লী আৰক্ষীয়ে তেওঁক চিকিৎসালয়লৈ লৈ গৈছে। সোনম ৱাংচুকক ছফদাৰজং হাস্পতাললৈ লৈ যোৱা হৈছে। বিগত ২০ দিন ধৰি সোনম ৱাংচুক অনশনত বহি আছিল।
সোনম ৱাংচুকক জৰুৰীকালীন ৱাৰ্ডত ভৰ্তি কৰা হৈছে। জানিব পৰা মতে, বৰ্তমান ৱাংচুকৰ অৱস্থা সুস্থিৰ।
যন্তৰ-মন্তৰত চিজিপিৰ নেতৃত্বত চলি থকা প্ৰতিবাদৰ মাজতে ২০ জুলাইত প্ৰতিবাদকাৰীসকলে সংসদ যাত্ৰাৰ ঘোষণা কৰিছিল। অৱশ্যে ইয়াৰ পূৰ্বেই সোনম ৱাংচুকক প্ৰতিবাদস্থলীৰ পৰা আঁতৰাই অনা হয়। আনহাতে শিক্ষাৰ্থীসকলকো তাৰ পৰা আঁতৰি যাবলৈ কোৱা হৈছে।
সোনম ৱাংচুকৰ অৱনতি ঘটা স্বাস্থ্য সন্দৰ্ভত দিল্লী উচ্চ ন্যায়ালয়ত হ’বলগীয়া শুনানিৰ পূৰ্বে আৰক্ষীয়ে যন্তৰ-মন্তৰত এই ব্যৱস্থা গ্ৰহণ কৰিছে। ইফালে, আদালতে পূৰ্বেই সোনম ৱাংচুকৰ দৈনিক ক্লিনিকেল স্বাস্থ্য পৰীক্ষা কৰাৰ নিৰ্দেশ দিছিল। আদালতে নিয়মীয়া চিকিৎসা নিৰীক্ষণ আৰু প্ৰয়োজনীয় চিকিৎসা সাহায্যৰ নিৰ্দেশ দিছিল। আদালতে স্বীকাৰ কৰিছিল যে যিকোনো নাগৰিকৰ জীৱন মূল্যৱান।
দিল্লী আৰক্ষীয়ে কয় যে, আদালতৰ নিৰ্দেশ আৰু চিকিৎসা বিশেষজ্ঞৰ পৰামৰ্শ অনুসৰি, স্বাস্থ্যৰ অৱনতি ঘটাৰ পৰিপ্ৰেক্ষিতত সোনম ৱাংচুকক প্ৰয়োজনীয় চিকিৎসা সেৱাৰ বাবে চিকিৎসালয়লৈ স্থানান্তৰ কৰা হৈছে।
বিগত ২০ দিন ধৰি যন্তৰ-মন্তৰত অনিৰ্দিষ্টকালীন অনশনত বহি থকা সোনম ৱাংচুকৰ ওজন বৃহস্পতিবাৰে ৯ কিলোগ্ৰামতকৈও অধিক হ্ৰাস পাইছে। তেওঁৰ চিকিৎসকে সকীয়াই দিছে যে দীৰ্ঘদিন ধৰি অনশন কৰাৰ বাবে তেওঁৰ স্বাস্থ্য জটিল পৰ্যায়ত উপনীত হৈছে আৰু ইয়াৰ ফলত তেওঁৰ অংগসমূহৰ ওপৰত প্ৰভাৱ পৰিবলৈ আৰম্ভ কৰিব পাৰে।
আনহাতে, অসমৰ লেখক, শিক্ষাবিদ, সাংবাদিক, কবি আৰু অৱসৰপ্ৰাপ্ত অসামৰিক বিষয়াসহ ১৬০ জনতকৈও অধিক বিশিষ্ট ব্যক্তিয়ে পৰিৱেশ কৰ্মী সোনম ৱাংচুকক তেওঁৰ অনিৰ্দিষ্টকালীন অনশন কাৰ্যসূচী সমাপ্ত কৰিবলৈ আহ্বান জনাইছিল। তেওঁলোকে ৱাংচুকৰ অৱনতি ঘটা স্বাস্থ্যক লৈ গভীৰ চিন্তা প্ৰকাশ কৰিছে আৰু তেওঁৰ এই শান্তিপূৰ্ণ প্ৰতিবাদৰ প্ৰতি কেন্দ্ৰ চৰকাৰে উদাসীনতা প্ৰদৰ্শন কৰা বুলি অভিযোগ উত্থাপন কৰিছে।
ককৰোচ জনতা পাৰ্টীয়ে নতুন দিল্লীৰ যন্তৰ মন্তৰত আয়োজন কৰা এক প্ৰতিবাদত অংশগ্ৰহণ কৰি যোৱা ২৮ জুনৰ পৰা ৱাংচুকে অনিৰ্দিষ্টকালীন অনশনত বহি আছে। NEET-UG পৰীক্ষাত সংঘটিত হোৱা বুলি অভিযোগ উঠা অনিয়মৰ বাবে তেওঁ কেন্দ্ৰীয় শিক্ষা মন্ত্ৰী ধৰ্মেন্দ্ৰ প্ৰধানৰ পদত্যাগ দাবী কৰিছে।
শুকুৰবাৰে জাৰি কৰা এটা যৌথ আহ্বানত, স্বাক্ষৰকাৰীসকলে কয় যে অনশনৰ ২০ সংখ্যক দিনত ভৰি দিয়াৰ লগে লগে ৱাংচুকৰ স্বাস্থ্যৰ অধিক অৱনতি ঘটিছে। সেয়েহে তেওঁলোকে ৱাংচুকক এই প্ৰতিবাদ প্ৰত্যাহাৰ কৰিবলৈ অনুৰোধ জনাইছিল।
আহ্বান পত্ৰখনত উল্লেখ কৰা হৈছে, "সোনম ৱাংচুক এজন বিশ্ববিখ্যাত পৰিৱেশ কৰ্মী আৰু শিক্ষাবিদ, যি লাডাখৰ জনসাধাৰণৰ গৌৰৱ আৰু আকাংক্ষাকো প্ৰতিনিধিত্ব কৰে। ভাৰত চৰকাৰে তেওঁৰ এই শান্তিপূৰ্ণ প্ৰতিবাদৰ প্ৰতি বহু আগতেই সঁহাৰি জনাব লাগিছিল।"
অৱশ্যে স্বাক্ষৰকাৰীসকলে অভিযোগ কৰি কয় যে, "যিটো শাসনব্যৱস্থা নিৰ্দয় আৰু ক্ষমতাৰ মতলীয়া যেন লাগে, তেনে এক ব্যৱস্থাৰ পৰা দয়া বা ভদ্ৰতা আশা কৰাটো অৰণ্য ৰোদনৰ দৰেই।"
তেওঁলোকে লগতে কয় যে, ক্ষমতাত থকাসকলৰ "হৃদয়হীনতা আৰু সংবেদনশীলতাহীনতা" ফাদিল কৰি ৱাংচুকে ইতিপূৰ্বেই নিজৰ উদ্দেশ্যত সফল হৈছে।
আহ্বান পত্ৰখনত কোৱা হৈছে, "ৱাংচুকৰ দৰে এজন বিশিষ্ট আৰু উচ্চ মৰ্যাদাৰ ব্যক্তিৰ এনে দীৰ্ঘদিনীয়া অনশনৰ পিছতো যেতিয়া চৰকাৰ অলপো লৰচৰ হোৱা নাই, তেতিয়া সাধাৰণ নাগৰিক আৰু ভিন্নমত পোষণ কৰা লোকসকলক কেনে ব্যৱহাৰ কৰা হ’ব, সেয়া কেৱল কল্পনাহে কৰিব পাৰি।"
এই আহ্বান পত্ৰখনত স্বাক্ষৰ কৰা সকলৰ ভিতৰত আছে বিশিষ্ট বুদ্ধিজীৱী হীৰেন গোহাঁই, অসমৰ প্ৰাক্তন আৰক্ষী সঞ্চালক প্ৰধান হৰেকৃষ্ণ ডেকা, গুৱাহাটীৰ প্ৰাক্তন আৰ্চবিশ্বপ থমাছ মেনামপৰম্পিল, প্ৰাক্তন ৰাজ্যসভাৰ সাংসদ অজিত কুমাৰ ভূঞা, সাহিত্য অকাডেমি বঁটা প্ৰাপক অপূৰ্ব শৰ্মা আৰু অৰূপা পটংগীয়া কলিতা। ইয়াৰ উপৰিও বহু কেইজন অৱসৰপ্ৰাপ্ত শিক্ষাবিদ, প্ৰাক্তন আৰক্ষী আৰু প্ৰশাসনিক বিষয়া, সম্পাদক আৰু অধিবক্তায়ো ইয়াত স্বাক্ষৰ কৰিছে।
.webp "প্ৰতিনিধিত্বমূলক ছবি")
