নতুন দিল্লী
পশ্চিমবংগৰ বৰুইপুৰত এগৰাকী ১২ বছৰীয়া কিশোৰীক ধৰ্ষণ আৰু হত্যা কৰাৰ মূল অভিযুক্তজন মঙলবাৰে পুৱতি নিশা আৰক্ষীৰ এনকাউণ্টাৰত নিহত কৰা হয়। বিষয়াসকলে জনোৱা মতে, ঘটনাৰ ক্ৰাইম চিন ৰিকনষ্ট্ৰাকচনৰ বাবে লৈ যোৱাৰ সময়ত অভিযুক্তই এজন আৰক্ষীৰ আগ্নেয়াস্ত্ৰ কাঢ়ি লৈ গুলীচালনা কৰাৰ পিছত এই ঘটনা সংঘটিত হয়।
প্ৰভাস মণ্ডল নামৰ এই অভিযুক্তজন আছিল কিশোৰীগৰাকীৰ ধৰ্ষণ আৰু হত্যাকাণ্ডৰ সৈতে জড়িত থকাৰ অভিযোগত গ্ৰেপ্তাৰ হোৱা তিনিজন লোকৰ ভিতৰত এজন। এই সপ্তাহৰ আৰম্ভণিতে বৰুইপুৰৰ এটা পুখুৰীত বস্তাৰ ভিতৰত ভৰাই থোৱা অৱস্থাত কিশোৰীগৰাকীৰ মৃতদেহ উদ্ধাৰ হৈছিল, যাৰ ফলত সমগ্ৰ অঞ্চলটোত তীব্ৰ ক্ষোভ আৰু হিংসাত্মক প্ৰতিবাদৰ সৃষ্টি হৈছিল।
আৰক্ষীৰ মতে, বৰুইপুৰ থানাৰ এটা দলে প্ৰভাস মণ্ডলক লগত লৈ নিশা প্ৰায় ১২:৪৫ বজাত সূৰ্যপুৰলৈ ৰাওনা হৈছিল, য’ৰ পৰা ভুক্তভোগীৰ মৃতদেহ উদ্ধাৰ কৰা হৈছিল। তাত ঘটনাটো কেনেকৈ ঘটিছিল তাৰ ক্ৰম পুনৰ নিৰ্মাণ কৰাৰ পৰিকল্পনা আছিল।
আৰক্ষীয়ে জনোৱা মতে, এই প্ৰক্ৰিয়া আৰম্ভ হোৱাৰ অলপ সময়ৰ আগতে মণ্ডলে এজন আৰক্ষী কৰ্মীৰ চাৰ্ভিচ ৰিভলভাৰটো কাঢ়ি লয়, আৰক্ষীৰ দলটোলৈ লক্ষ্য কৰি এক ৰাউণ্ড গুলী চলায় আৰু পলায়ন কৰিবলৈ চেষ্টা কৰে।
প্ৰত্যুত্তৰত আৰক্ষীৰ দলটোৱেও গুলীচালনা কৰে, যাৰ ফলত তেওঁ আহত হয়। তেওঁক ততাতৈয়াকৈ বৰুইপুৰ হাস্পতাললৈ লৈ যোৱা হয় যদিও চিকিৎসকে তেওঁক মৃত বুলি ঘোষণা কৰে।
জুলাইৰ ৫ তাৰিখে মৃতদেহ উদ্ধাৰ হোৱাৰ পূৰ্বে ভুক্তভোগী কিশোৰীগৰাকী সন্ধানহীন হৈ আছিল। মৃতদেহ উদ্ধাৰ হোৱাৰ পিছতে স্থানীয় ৰাইজৰ মাজত ক্ষোভৰ জুই জ্বলি উঠে। তেওঁলোকে কৰ্তৃপক্ষৰ বিৰুদ্ধে ক্ষিপ্ৰ ব্যৱস্থা গ্ৰহণ নকৰাৰ অভিযোগ উত্থাপন কৰে আৰু দোষীক তৎকালীনভাৱে গ্ৰেপ্তাৰ কৰাৰ দাবী জনায়।
উত্তেজিত স্থানীয় ৰাইজে বৰুইপুৰ-জয়নগৰ পথ অৱৰোধ কৰি, টায়াৰ জ্বলাই আৰু আৰক্ষীৰ বাহন ভাঙচৰ কৰি প্ৰতিবাদ সাব্যস্ত কৰে।
এই গোচৰে আন এক নাটকীয় মোৰ লয় যেতিয়া ইন্দ্ৰজিৎ মণ্ডল নামৰ এজন ব্যক্তিক ক্ষুব্ধ জনতাই অপৰাধৰ সৈতে জড়িত থকাৰ সন্দেহত গণপ্ৰহাৰ কৰি হত্যা কৰে।
কিশোৰীগৰাকীৰ মৃতদেহ উদ্ধাৰ হোৱাৰ কেইঘণ্টামানৰ পিছতে একাংশ উগ্ৰ জনতাই ইন্দ্ৰজিৎ মণ্ডলক আক্ৰমণ কৰি হত্যা কৰে।
অৱশ্যে পিছত আৰক্ষীয়ে স্পষ্ট কৰি দিয়ে যে তেওঁ এই ধৰ্ষণ-হত্যাকাণ্ডৰ গোচৰৰ সৈতে জড়িত নাছিল।
আৰক্ষীয়ে ইতিমধ্যে এই গণপ্ৰহাৰৰ ঘটনাৰ সৈতে জড়িত থকাৰ অভিযোগত তিনিজন লোকক গ্ৰেপ্তাৰ কৰিছে আৰু ধৰ্ষণ-হত্যাকাণ্ডৰ বিতং তদন্তৰ বাবে ছয়জনীয়া এক বিশেষ তদন্তকাৰী দল গঠন কৰিছে।
ৰাইজৰ বৰ্ধিত ক্ষোভৰ মাজতে পশ্চিমবংগৰ মুখ্যমন্ত্ৰী শুভেন্দু অধিকাৰীয়ে মঙলবাৰে আৰক্ষী সঞ্চালক প্ৰধান সিদ্ধ নাথ গুপ্তাক ৭২ ঘণ্টাৰ ভিতৰত এই গোচৰৰ প্ৰতিবেদন দাখিল কৰিবলৈ নিৰ্দেশ দিয়ে। লগতে তেওঁ কয় যে তদন্তত কোনো ধৰণৰ গাফিলতি ধৰা পৰিলে কঠোৰ ব্যৱস্থা গ্ৰহণ কৰা হ’ব।
গোচৰটোক লৈ ক্ৰমাৎ বৃদ্ধি পোৱা ৰাজনৈতিক আৰু ৰাজহুৱা সমালোচনাৰ মাজতে মুখ্যমন্ত্ৰীয়ে ভুক্তভোগীৰ পৰিয়ালক সাক্ষাৎ কৰে আৰু তদন্তৰ অগ্ৰগতিৰ পৰ্যালোচনা কৰে।
দক্ষিণ ২৪ পৰগণাৰ আৰক্ষী অধীক্ষকৰ কাৰ্যালয়ত ভুক্তভোগীৰ পৰিয়ালক সাক্ষাৎ কৰাৰ পিছত অধিকাৰীয়ে সাংবাদিকৰ আগত কয়, "সমগ্ৰ বিষয়টো পৰীক্ষা কৰা হৈছে। মই এক প্ৰাথমিক বিশ্লেষণ কৰিছোঁ। মই ডিজিপিক ৭২ ঘণ্টাৰ ভিতৰত প্ৰতিবেদন দাখিল কৰিবলৈ কৈছোঁ। সেই অনুসৰি আমি কঠোৰ ব্যৱস্থা ল’ম। এজাহাৰ দাখিল কৰাৰ পিছত লোৱা সময়ৰ ক্ষেত্ৰত যদি এক শতাংশও গাফিলতি পোৱা যায়, তেন্তে ব্যৱস্থা গ্ৰহণ কৰা হ’ব।"
তেওঁ কয় যে এতিয়ালৈকে হোৱা আৰক্ষীৰ তদন্তৰ ভিত্তিত, গণপ্ৰহাৰত নিহত হোৱা ইন্দ্ৰজিৎ মণ্ডল নিৰ্দোষী আছিল আৰু তেওঁৰ পৰিয়ালে ন্যায় পাব বুলি আশ্বাস দিয়ে।
তেওঁ লগতে কয় যে প্ৰতিবাদৰ সময়ত চৰকাৰী সম্পত্তি ভাঙচৰ কৰা, আৰক্ষীৰ বাহন আৰু ৰেলপথৰ ক্ষতিসাধন কৰাৰ সৈতে জড়িত থকা প্ৰায় ২০০ জন লোকক চিনাক্ত কৰা হৈছে আৰু তেওঁলোকক গ্ৰেপ্তাৰ কৰা হ’ব।
ইন্দ্ৰজিৎ মণ্ডলৰ গণপ্ৰহাৰৰ সৈতে জড়িত থকা লোকসকলৰ বিৰুদ্ধে হত্যাৰ গোচৰ ৰুজু কৰা হ’ব বুলিও তেওঁ উল্লেখ কৰে।
মুখ্যমন্ত্ৰীয়ে লগতে জনায় যে ভুক্তভোগীৰ পৰিয়ালে সূৰ্যপুৰত এটা আৰক্ষী চকী স্থাপনৰ অনুৰোধ জনাইছিল, যাৰ বাবে তেওঁ পৰৱৰ্তী বৰুইপুৰ ভ্ৰমণৰ সময়ত ইয়াৰ উদ্বোধন কৰাৰ প্ৰতিশ্ৰুতি দিয়ে।
তেওঁ কয় যে পৰিয়ালটোৱে ক্ষতিপূৰণ আৰু অন্যান্য সাহায্যৰ দাবী জনাইছে, যাৰ বিষয়ে এসপ্তাহৰ ভিতৰত দুয়োটা ক্ষতিগ্ৰস্ত পৰিয়ালক পুনৰ সাক্ষাৎ কৰাৰ পিছত ঘোষণা কৰা হ’ব।
অধিকাৰীয়ে লগতে দাবী কৰে যে বিৰোধী দল আৰু "উগ্ৰপন্থী তথা দেশবিৰোধী শক্তি"ৰ সৈতে জড়িত একাংশ লোকে এই হিংসাত্মক পৰিস্থিতিৰ সৃষ্টি কৰিবলৈ উচটনি দিছিল। তেওঁ কয় যে তদন্তকাৰীসকলে ইয়াৰ বাবে দায়ীসকলৰ বিৰুদ্ধে কল ৰেকৰ্ডিং আদিকে ধৰি বিভিন্ন প্ৰমাণ সংগ্ৰহ কৰিছে।
দিনটোৰ শেষৰ ফালে অধিকাৰীয়ে হিংসাত্মক ঘটনাত আহত হোৱা আৰক্ষী কৰ্মীসকলক সাক্ষাৎ কৰে আৰু ৰাজ্যিক প্ৰশাসনৰ তৰফৰ পৰা সকলো সম্ভৱপৰ সহযোগিতাৰ আশ্বাস দিয়ে।
মৃত কিশোৰীগৰাকী আৰু ইন্দ্ৰজিৎ মণ্ডল দুয়োৰে পৰিয়ালৰ সদস্যসকলে কয় যে তেওঁলোকে মুখ্যমন্ত্ৰীৰ আশ্বাস আৰু ন্যায় প্ৰদানৰ প্ৰতিশ্ৰুতিত সন্তুষ্ট হৈছে।
