ইছমাইল হোছেইন

অসমৰ মুছলমান সমাজে বিহুক কেনেধৰণৰ আন্তঃৰিকতাৰে নিজৰ উৎসৱ বুলি গ্ৰহণ কৰিছে, তাৰে প্ৰমাণ হৈছে উনৈশ শতিকাৰ অন্তিম ভাগত গুৱাহাটীত ব্ৰহ্মপুত্ৰৰ বালিচৰত সাতদিনীয়াকৈ আয়োজন কৰা বিহু উৎসৱ। উৎসৱটি ৰাজহুৱাভাৱে আয়োজন কৰিছিল মাছখোৱাৰ গম্বুজৱালা মছজিদৰ প্ৰতিষ্ঠাতা, ব্ৰিটিছ চৰকাৰৰ খান বাহাদুৰ সন্মানপ্ৰাপ্ত সদৰামীন তথা 'অৰুণোদয়' যুগৰ লেখক মুন্সী কেফায়ৎ উল্লাই। 

অসমৰ বাহিৰতো আয়োজন কৰা মাঘ বিহুৰ অনুষ্ঠানে মুছলমান সমাজৰ কিছুসংখ্যক ব্যক্তিয়ে সক্ৰিয়ভাৱে অংশগ্ৰহণ কৰাৰ নিদৰ্শন আছে। উদাহৰণস্বৰূপে ক'ব পাৰি যে ১৯২১ খ্ৰীষ্টাব্দৰ ১৩ জানুৱাৰীত কলকাতাৰ শিৱপুৰ বটানিকেল গাৰ্ডেনত অসমীয়া সমাজে উলহ-মালহেৰে মাঘ বিহুৰ আয়োজন কৰিছিল। সেই উৎসৱ আয়োজনত যিসকলে মুখ্য ভূমিকা পালন কৰিছিল, তেওঁলোকৰ মাজৰ অন্যতম আছিল খেলিলুৰ জামান।