ছেইণ্ট পিটাৰ্ছবাৰ্গ (ৰাছিয়া)
ৰাছিয়াৰ ৰাষ্ট্ৰপতি ভ্লাদিমিৰ পুটিনে বৃহস্পতিবাৰে ভাৰতক “মহান দেশ” বুলি প্ৰশংসা কৰি নতুন দিল্লীৰ স্বতন্ত্ৰ বৈদেশিক নীতি ৰক্ষা কৰাৰ লগতে ৰাছিয়াৰ সৈতে সহযোগিতাক লৈ আমেৰিকাই ভাৰতক হেঁচা প্ৰয়োগ কৰাৰ প্ৰচেষ্টাৰ ওপৰত গুৰুত্ব আৰোপ কৰি কয় যে, এনে পদক্ষেপ দ্বিপাক্ষিক আৰু আন্তঃৰাষ্ট্ৰীয় সম্পৰ্কৰ বাবে “ক্ষতিকাৰক”।
ছেইণ্ট পিটাৰ্ছবাৰ্গ অৰ্থনৈতিক মঞ্চত সংবাদ মাধ্যমক সম্বোধন কৰি পুটিনে কয়, "আমি সুখী যে ভাৰতে সকলো দেশৰ সৈতে নিজৰ সম্পৰ্ক গঢ়ি তুলিছে। এয়া এখন মহান দেশ।"
বৃহত্তম গণতন্ত্ৰ আৰু সমৃদ্ধিশালী অৰ্থনীতিক প্ৰশংসা কৰি পুটিনে কয় যে, “ভাৰতে যিবোৰ দেশক প্ৰয়োজনীয় বুলি বিবেচনা কৰে, সেইবোৰ দেশৰ সৈতে নিজৰ স্বাৰ্থ অনুসৰি নিজৰ অৰ্থনীতিৰ বিকাশ কৰাটো স্বাভাৱিক।”
তেওঁ লগতে কয়, "উদাহৰণস্বৰূপে ৰাছিয়াৰ সৈতে সহযোগিতাৰ ক্ষেত্ৰত আমেৰিকাই ভাৰতক হেঁচা প্ৰয়োগ কৰিবলৈ চেষ্টা কৰিছে। কিন্তু নৰেন্দ্ৰ মোদীৰ ওপৰত হেঁচা প্ৰয়োগ কৰাটো আন্তঃৰাষ্ট্ৰীয় সম্পৰ্ক আৰু দ্বিপাক্ষিক সম্পৰ্কৰ বাবে ক্ষতিকাৰক। এই হেঁচা ক'ৰ পৰা আহিছে, সেয়া গুৰুত্বপূৰ্ণ কথা নহয়।"
প্ৰধানমন্ত্ৰী নৰেন্দ্ৰ মোদীৰ নেতৃত্বত ভাৰতৰ অৰ্থনৈতিক বিকাশৰ সন্দৰ্ভত ৰাষ্ট্ৰপতি পুটিনে কয়, "ভাৰত বিশ্বৰ আগশাৰীৰ অৰ্থনীতিসমূহৰ ভিতৰত অন্যতম, য'ত অৰ্থনৈতিক বিকাশৰ হাৰ সৰ্বাধিক। এয়া এনে এক ঘটনা নহয়, যি হঠাতে ঘটিছে। এয়া প্ৰধানমন্ত্ৰী মোদীৰ নেতৃত্বত চৰকাৰে কৰা কঠোৰ পৰিশ্ৰমৰ ফল।"
ৰাছিয়াৰ ৰাষ্ট্ৰপতিয়ে কয়, "মই এই সম্পৰ্কক এনেদৰেই বৈশিষ্ট্য প্ৰদান কৰোঁ। কালি বা এবছৰ বা পাঁচ বছৰ আগতে এইটো হোৱা নাছিল। এইটো এটা কথা আমি দশক দশক ধৰি কাম কৰি আহিছো। ১৯৪৭ চনত যেতিয়া ছোভিয়েট ইউনিয়নে ভাৰতীয় গণৰাজ্যৰ সৈতে কূটনৈতিক সম্পৰ্ক স্থাপন কৰিছিল, তেতিয়া আমি এখন নতুন ৰাষ্ট্ৰ, নতুন স্বাধীন ৰাষ্ট্ৰ প্ৰতিষ্ঠাত সহায় কৰিবলৈ সকলো কাম কৰি আহিছো। মই এইটো ক'বলৈ পাই আনন্দিত হৈছো যে, ভাৰতীয় জনসাধাৰণৰ কঠোৰ পৰিশ্ৰম আৰু প্ৰতিভাৰ বাবে ভাৰতে ইয়াৰ বিকাশৰ ক্ষেত্ৰত বৃহৎ আৰু গুৰুত্বপূৰ্ণ সাফল্য অৰ্জন কৰিছে।"
